Mi a nase i a risibí mi edukashon na Kòrsou. Mi ta kasá i ta mama di un yu hòmber. Loke ta stimulá mi komo coach, ta pa mira ku atraves di mi aporte tin kambio den e manera di pensa i di biba di e kliente i pa laga hende eksperensiá mas satisfakshon i éksito den su bida. E intenshon ta, pa e kliente eksperensiá un diferensia di loke su bida tabata promé i despues di e coach. Ta p’esei mi ta usa e lema: “You will be different!
Despues di HAVO mi a studia pa ‘management secretaresse’ i a traha komo ‘directie secretaresse’ na Kòrsou i despues na Hulanda. Despues di algun aña ku mi a biba na Hulanda mi a traha tambe den atministrashon di finansa. Mi tabata kier a eksperensiá mas satisfakshon i éksito den mi bida, p’esei mi a disidí di bai hasi algu otro.
Un hende por diskubrí oséanonan nobo, si e tribi pèrdè su bista for di kosta!
Un dia mi tabata sùrf riba mi kòmpiuter i mi tabata hasi e pregunta: “Señor kiko Bo kier pa mi hasi?” Mi a haña mi riba un website di un instituto ku ta ofresé estudio pa bira ‘Life Coach’. Di paden mi a haña un konvikshon pa sigui e kurso akí pasobra mi ta gusta yuda hende ku ta dispuesto na trese kambio den nan bida. Esaki ta kuadra ku e eksperensia ku mi a haña trahando komo miembro di ‘Tim di Kuido’ den un iglesia. Awor mi ta trahando komo un ‘Life Coach’ profeshonal diplomá i mi ta kontentu di a skohe pa esaki.
Aki ta sigui algun testimonio di hendenan ku ta konta kon nan a eksperensiá mi komo nan coach i ki balor e coach a agregá na nan bida:
– “Mi a eksperensiá Irene komo un coach agradabel. E echo ku mi konosé personalmente, no
tabata visibel durante di e sekshonnan. El a sa di hasi bon distinshon entre loke ta privá i loke ta alkaso. E tabata un bon intermediario, e tabata reflehá trankilidat i tabatin bista pa mi komo persona, pero tambe pa e resultado final. Komo coach el a duna teps, pero a laga na mi mes pa bin ku solushon pa logra e meta. Dor di e coach mi a bira asertivo i for di hendenan yegá na mi, tin remarke positivo pa ku esaki. Mi ta atendé mihó ku feedback ku mi risibí i ta pone mas atenshon na e mensahe.”
– “Komo mi coach m’a haña ku bo ta tuma bo trabou hopi na serio. Mi a ripará ku bo ta duna hopi atenshon i ta hasi hopi esfuerso pa nos logra e meta. Bo tabata atento pa ku mi manera di reakshoná, i a hasimi konsiente di hopi kos ku nunka mi a para ketu n’e. Dor di e coach mi a bira sigur di mi mes, mi por komuniká mihó i por mantené kontakto visual.”
– “Mi a eksperensiá bo komo un persona konfiabel, kapas i ku gusta yuda. Bo tin hopi konosementu, bo ta kompetente i tin hopi pasenshi. Ora ku mi no ta komprondé algu, bo tabata tuma tempu pa splika ku hopi amor. Dor di e coach, mi a drecha mi manera di biba i mi sistema di hasi gastu.”